Dane Paulus ring Kota Korintus
18
Kaceritayang mangkin dane Paulus matilar saking Kota Atena,
tur dane luas ka Kota Korintus.
2 Irika saget dane matemu sareng anak Yahudi sane mapesengan Akwila,
nenten tios anak lanang sane maasal saking Wawidangan Pontus.
Dane Akwila sareng rabinnyane sane mapesengan Priskila wawu rauh saking Kota Roma ring Wawidangan Italia.
Krana duk punika Kaisar Klaudius sampun mrentahang mangda makasami anak Yahudine matilar saking Kota Roma.
Irika dane Paulus simpang ka jeron dane Akwila lan dane Priskila.
3 Dane Paulus raris meneng tur makarya sareng-sareng dane makakalih,
krana pakaryan danene pateh,
inggih punika tukang jait tendaa.
4 Sebilang rahina Sabat dane Paulus ngranjing ka bale wantilan agama Yahudine.
Irika dane Paulus ngutsahayang mangda anak Yahudi wiadin anak Yunani dados pracaya.
5 Sasampune dane Silas sareng dane Timotius rauh saking Makedonia,
dane Paulus nenten malih dados tukang tenda.
Tatujone mangda dane prasida tetep ngortiang pengajahan saking Sang Hyang Pengardi.
Dane dados saksi kapining anak Yahudine indik Sang Hyang Yesus nenten tios Kristus sane maarti Sang Prabu Sane Kajanjiang.
6 Nanging krana anake akeh setata nglawan tur nganistayang dane,
dane ngampigang buk saking penganggen danene mangda dados tanda ipun sami sane nanggung ukuman saking Sang Hyang Pengardi.
Dane Paulus raris mabaos sapuniki,
“Yening jerone sengkala,
punika krana kaiwangan jerone praragan:
nenten ja tanggung jawab tiange!
Ngawit mangkin tiang jagi luas ka bangsa-bangsa nenten Yahudi.”
7 Raris dane Paulus matilar saking bale wantilan agama Yahudine tur ngranjing ring umah sane wenten ring samping bale wantilane punika.
Umahe punika druen anak nenten Yahudi sane mapesengan Titius Yustus.
Ipun bakti kapining Sang Hyang Pengardi.
8 Nanging kelian bale wantilane sane mapesengan Krispus sareng saluirin anake sane meneng ring umahnyane pracaya kapining Sang Ratu Agung.
Kenten pada akeh warga Kota Korintus mirengin pengajahan dane Pauluse.
Tur ipun sami dados pracaya raris kalukat dados tanda ipun ngiring Sang Hyang Yesus.
9 Kaceritayang ritatkala wengi,
masrana pelawatane Sang Ratu Agung masabda kapining dane Paulus sapuniki,
“Duh Paulus!
Eda ja cening jejeh!
Setata ja ortiang Orti Rahayune tur eda ja cening mendep!
10 Krana Nira sane nyarengin cening.
Tur tusing ada anak ane nyidang ngejuk tur nyengkalen cening.
Krana liu anake di kotane ene druen Nirane.”
11 Punika mawinan dane Paulus meneng ring Kota Korintus kantos atiban tengah suene.
Dane ngajahin pengajahan saking Sang Hyang Pengardi kapining anake irika.
12 Nanging tatkala anak sane mapesengan Galio mamrentah dados gubernur ring Propinsi Akaya,
para anak Yahudine pada adung ngejuk dane Paulus,
raris makta dane ka pengadilan.
13 Irika,
para anak Yahudine nuduh dane sekadi puniki,
“Anake puniki ngajak-ngajakin anake akeh mangda nyembah Sang Hyang Pengardi nganggen tata cara sane matungkasan sareng ukum agama Yahudine!”
14 Ritatkala dane Paulus jagi nyaurin ipun sami,
irika gubernur Galio mabaos kapining anak Yahudine sapuniki,
“Duh warga Yahudi!
Yening ragane nuduh anak indik nglanggar ukum bangsa Romane wiadin malaksana sane jaat,
sapatutne tiang sabar mirengin tuduhan ragane.
15 Nanging ragane wantah maiegan indik babaosan,
indik pesengan,
lan indik ukum agaman ragane praragan.
Tiang nenten kayun dados akim buat paindikane puniki.
Ragane sami kamanten sane sapatutne mragatang prakaran ragane puniki.”
16 Raris gubernur Galio ngusir ipun sami saking pengadilane punika.
17 Irika raris para anak Yahudine punika ngejuk dane Sostenes,
kelian bale wantilan agama Yahudine,
saha nyagurin ipun ring arepan pengadilane.
Nanging gubernur Galio nenten ngrunguang paindikane punika.
Dane Paulus Mawali ka Kota Antiokia
18 Sasampune kenten,
makudang minggu suene dane Paulus meneng ring Kota Korintus.
Raris dane mapamit kapining para pengiring sane wenten irika.
Sadereng dane malayar saking Kota Kengkrea,
dane nyukur rambut danene sane sampun lantang,
santukan dane sampun majanji ring Sang Hyang Pengardi.
Salanturnyane dane malayar sareng dane Priskila lan dane Akwila nuju Propinsi Siria.
19 Sasampune rauh ring Kota Epesus,
dane Paulus ngalain dane Priskila lan dane Akwila.
Dane raris ngranjing ka bale wantilan agama Yahudine tur mabligbagan sareng para anak Yahudine sane wenten irika.
20 Ritatkala para anak Yahudine punika nunas mangda dane Paulus meneng malih makudang dina irika,
dane nenten kayun.
21 Nanging tatkala sedek mapamit,
dane mabaos sapuniki,
“Yening Sang Hyang Pengardi mapikayun,
tiang jagi mawali malih mriki.”
Irika raris dane Paulus malayar saking Kota Epesus.
22 Ritatkala dane Paulus rauh ring Kota Kaisarea,
dane luas ka Yerusalem mangda ngaturang salam ring para krama druen Sang Hyang Yesuse irika.
Raris dane nglanturang pamargin danene nuju ka Kota Antiokia.
23 Sasampune makudang dina dane meneng ring Antiokia,
dane raris luas tur ngliwatin Wawidangan Galatia lan Prigia mangda ngukuhang manah para pengiringe irika.
Dane Apolos ring Kota Epesus lan Kota Korintus
24 Kaceritayang mangkin,
wenten adiri anak Yahudi sane mapesengan Apolos rauh ka Kota Epesus.
Anake punika maasal saking Kota Aleksandria.
Dane anak wikan mawicara tur uning pisan daging Cakepan Sucine.
25 Turmaning dane Apolos punika sampun nerima pengajahan Sang Ratu Agung.
Dane saat tur nyantep pisan ngajahin indik Sang Hyang Yesus manut cara sane patut.
Yadiastun kenten,
dane wantah uning indik penglukatan dane Yohanes sane dados tanda anak masalin saking urip sane madosa.
26 Dane Apolos wanen pisan ngajahin ring bale wantilan agama Yahudine.
Duk mirengin pengajahane punika,
dane Priskila lan dane Akwila ngundang dane Apolos ka umahnyane.
Irika dane sareng kalih nerangin kantos jangkep pengajahan Sang Hyang Pengardine ring dane Apolos.
27 Sasampune kenten,
dane Apolos meled luas ka Propinsi Akaya.
Irika raris para anak pracayane ring Kota Epesus ngukuhang manah danene;
ipun nulis surat majeng ring para pengiring sane meneng ring Akaya.
Tatujone mangdane kramane irika kayun nerima dane Apolos.
Duk rauh ring Akaya,
dane Apolos nulungin para anake sane pracaya ring Sang Hyang Yesus malantaran wara nugraha Sang Hyang Pengardi.
28 Krana baos danene mawibawa pisan,
dane Apolos ngalahang baos para anak Yahudine ring arepan anake akeh.
Irika dane nganggen daging Cakepan Sucine buat muktiang indik Sang Hyang Yesus punika Sang Prabu sane kajanjiang olih Sang Hyang Pengardi idumun.